හොලිවුඩ් නළු නිළියන් විදින වදයක්

හොලිවුඩ් නළු නිළියන් විදින වදයක් දෙනෝ දහසක් වසඟයට ගත හැකි කඩවසම් පෙනුමක් හා ලස්සන රුවක් ඇති ඕනෑම තරුණයකුට හෝ තරුණියකට සිනමා තාරකාවක් වීමට ලෙහෙසියෙන්ම පුළුවන. ලස්සන රූපය රංගන ශිල්පියකුවීම සඳහා අවශ්‍යවන සුදුසුකමක් බැවිනි. එහෙත් මේ ලස්සන රූපය - රසිකයන් මෝහනයට පත්කරනු ලබන නාරිදේහය කොයිතරම් කලක් ඒ අයුරින්ම රඳවා තබා ගත හැකි ද? වැඩිම වුණොත් දශක තුනක් එම රුව පවතියි. ඉන්පසු....?ඕනෑම කෙනකු තත්පරෙන් තප්පරයට වයසට යන බව හැබෑවකි. කෙනකු වයසට යෑම සක්කරයාටවත් නැවැත්විය නොහැකි ය. වයසට යන විට ඕනෑ ම කෙනකුගේ රුව වෙනස් වීම ස්වභාවිකය. නළු නිළියන්ට ද මෙම පොදු ධර්මතාව එසේ ම බලපායි. එහෙත් කවුරු වයසට ගියත්, වයසට යෑමට අකමැති එකම ජාතිය නළු නිළියෝය. වයසට යෑමට පමණක් නොව රූපය නැති කර ගැනීමට ද මොවුන් කැමැති නැත. කොපමණ වයසට ගියත් රුව රැක ගැනීම සඳහා මොවුන් නො කරන දෙයක් නැත. එයට හේතුව ඔවුන්ගේ පැවැත්ම හා ජනප‍්‍රියත්වය රඳා පවතින්නේ රූපය මත බැවිනි. රූපය නැති වූ දාට ඔවුනට සිනමාවෙන් සමුගැනීමට අනිවාර්යයෙන්ම සිදුවෙයි.මේ නිසා විශේෂයෙන් ම හොලිවුඩ් සිනමා නළු නිළියෝ කොපමණ වයසට ගියත් හැමදාමත් තාරුණ්‍යය රැක ගැනීමටත් තිරිහන් වීමටත් පුදුම වෙහෙසක් දරන බව පෙනේ. මෙන්න එයට නිදසුන් කීපයක්.ටීනා ටර්නර් හොලිවුඩ් හි සිටින හැටපැන්න ගැහැනියකි. දැනට හැට තුන්වන විය පසුකරමින් සිටින ටීනා තමන්ගේ රුව රැක ගැනීම සඳහා කිසි දිනක ව්‍යායාම වල නොයෙදෙයි. එහෙත් දිනපතා රාතී‍්‍රකාලයට පැය තුනක් වේදිකාව මත රඟුම් පායි. තමන්ගේ රුව රැක ගැනීම සඳහා වේදිකාව මත කරන රැගුම හොඳම ව්‍යායාමක් බව ටීනා කියයයි. ටීනා ඇගේ මුහුණ ගැන ද විශේෂ අවධානයක් යොමු කරයි. රංගන ශිල්පියකුගේ වටිනාම වස්තුව මුහුණ බව ඇය කියයි. වයසට ගියත් මුහුණේ සහ ඇගපතේ හැඩ රුව රැක ගැනීමට තමා වෙහෙසෙන බව ඇය සඳහන් කරයි. අද හැත්තෑ දෙවෙනි වියේ පසුවන ඇන්ගි ඩිකින්සන් නමැති නිළිය පෙනුමෙන් තවමත් තරුණියක වැන්න. මෙම තරුණකම ලබා ගැනීම සඳහා ඇන්ගි පටක සැත්කම් (Plastic surgery)කීපයකටම මුහුණ දුන් බව කියයි. කෙනකු වයසට යන විට ශරීරයේ හම හැකිලී, රැළි වැටෙයි. මෙම රැළි වැටීම නවත්වා ගැනීමට ඇති හොඳම ප‍්‍රතිකර්මය පටක සැත්කම බව ඇය කියයි.ඩෙටී මුරේ ද අද පනස් විය ඉක්මවමින් සිටින හොලිවුඩ් නිළියකි. අඩ සිය වසක් ගෙවා සිටින ඩෙටී තරුණකම රැක ගැනීම සඳහා නොයක් විධියේ ආලේප වර්ග ගල්වයි. සිරුර තිරිහන්ව තබා ගැනීම සඳහා ටැබ්ලට් වර්ග ගනී. “නිළියක හැටියට මගේ වටිනාම වස්තුව මගේ මුහුණ හා ශරීරයයි..... දිරාපත්වන්න නොදී එය රැක ගැනීම මගේ යුතුකමක්” ඩෙටී කියයි.හතළිස් පස්වෙනි විය පසු කරමින් සිටින පොප් ගායිකා - නිළි මැඩෝනා ඇගේ රුව රැක ගැනීම සඳහා දිවා රෑ වෙහෙසෙන කලාකාරියකි. සම පැහැපත්ව තබා ගැනීම සඳහා ඇය නොයෙක් වර්ගයේ ආලේප ගල්වයි. හැමදාමත් තිරිහන් වී සිටීමට අවශ්‍ය බව ඇය කියයි. එහෙත් ඒ සඳහා පටක සැත්කම් කිරීමට කැමැති නැති බව ද මැඩෝනා කියා සිටියි.ගොල්ඩ් හැවන් නමැති හොලිවුඩ් නිළිය මේ ගෙවා දමමින් සිටින්නේ පනස් හත්වෙනි අවුරුද්දය. පනස් පස්වන විය පසු කරන විට ඇගේ මුහුණේ රැළි වැටීමට පටන් ගත්තේ ය. ඒ සමඟම ඇගේ තරුණ කම ගිලිහී ගියේ ය. ගෝල්ඩ් ඇගේ රැළි වැටෙමින් තිබෙන මුහුණ පටක සැත්කමට භාජනය කළා ය. මෙම සැත්කමෙන් පසු ගෝල්ඩි යළිත් තරුණියක වී සිටියි.පටක සැත්කම් වලින් රුව රැක ගැනීමට බැරි බව පවසන්නේ සුසාන් සරන්ඩොන් ය. අද පනස් හයවන වියේ පසුවන මෙම හොලිවුඩ් නිළිය ව්‍යායාම්වල නිරත වීමෙන් හා සම පැහැපත්ව තබා ගැනීම සඳහා ආලේප ගැල්වීමෙන් තරුණකම රැක ගෙන සිටියි. තෙල් කෑම නොගැනීමටත්, චොකලට්, කේක් වැනි පැණි රස කෑම වර්ග නොගැනීමටත් ඇය වග බලා ගනියි. තරුණකම රැක ගැනීමට නම් කට (කෑමෙන් - බීමෙන්) පරිස්සම් කර ගත යුතුව ඇතැයි ද ඇය පවසයි.ජේන් පොන්ඩා හැටේ දශකයේ හොලිවුඩ් සිනමාවේ රජ කළ නිළියකි. රංගන ශිල්පිනියක ගේ පැවැත්මට රූපය හා තරුණකම අවශ්‍යම දෙයක් බව ඇය කියයි. මේ දෙකම ගිලිහී ගියදාට නිළිකම නැතිවෙන බව කියන ජේන් පොන්ඩා රූපය හා තරුණකම ආරක්ෂා කර ගැනීම හැම රංගන ශිල්පිනියක්ගේම වගකීම බව ද කියයි. පටක සැත්කම්වලට භාජන නොවී රූපය රකින බෙහෙත් හා ව්‍යායාම් ගැනීමෙන් තරුණකම හා රුව රැක ගැනීමට පුළුවන් වන්නේ යැයි ජේන් පොන්ඩා කියා සිටියි. එලි මැක්පර්සන් නමැති නිළිය ද පටක සැත්කමකට මුහුණ දුන් රංගන ශිල්පිනියකි. හැට පිරෙන විට හැම කෙනෙකු ගේම බෙල්ලේ සහ මුහුණේ රුළි වැටෙයි. ව්‍යායාම කිරීමෙන් හෝ ආලේප ගැල්වීමෙන් හෝ රැළිවැටීම  නතර කළ නො හැකි බව ඇගේ මතයයි. පටක සැත්කමකට භාජනය වීමෙන් මෙම රැලි නැතිකර ගත හැකි බව එලී සඳහන් කරයි.වයසට යන විට ඕනෑම කෙනෙකුගේ හැඩරුව වෙනස් වීම ස්වභාවික ය. අත පය, බෙල්ල, සහ මුහුණ යන තැන්වල රැළි මතුවීමට පටන් ගනී. නළල හා ඇස් යට ඉරි මතුවෙයි. මුහුණේ පැවති තරුණ කම හා හැඩය වෙනස් වී යයි. සමහර විට කම්මුල් මහත්වී මුහුණේ තිබූ පියකරු බව නසා දමයි. මෙවන් අවස්ථා වල දී ආලේප ගැල්වීමෙන් හෝ ව්‍යායාම්වල යෙදී මෙන් හෝ නැති වී ගිය තරුණ කමවත්, රූපයවත් යළි ලබා ගැනීමට නොහැකි බව වෛද්‍යවරු මත පළකරති. මුහුණේ වෙනස් වීම සහ රැළි වැටීම නැති කර යළි තරුණකම ලබා ගැනීමට කළ යුතු එකම පිළියම පටක සැත්කමකට මුහුණ දීමය. එවැන්නක් නොකර මුහුණේ ඇතිවන වෙනස් කම වෙනස් කළ නොහැකි යැයි ද දොස්තරවරු කියා සිටිති.බාබරා හර්සේ, සිල්වෙස්ටර් ස්ටැලෝන්, ලිසා කුඩ්රෝව්, හොලී හන්ටර්, ඩෲ බෙරිටොර්, නටාලි පොම්මන්, ටොම් කෲස්, ටෙරි ටයිලප් මුරේ, කාල් බුර්නට් සහ චීර් යන හොලිවුඩ් නළු නිළියන් අද තරුණ කමත් රූමත් බවත් රැකගෙන සිටින්නේ පටක සැත්කම්වලට පිංසිදු වන්නට ය. ඔවුන්ගේ තිරිහන්වීමේ රහස ද එයයි.